Light a PawVisit the memorial hall
進寶(寶仔)

進寶(寶仔)

日記

“寶仔要快啲翻黎搵我🫶🏻等你啊❤️”

7月17日嗰日係落雨行雷既一日,嗰日放工返黎就好似平時咁開罐頭俾你地食,當時寶仔你仲同平時一樣咁食罐頭嫁,由細到大你都係中意食罐頭多啲😔我又點會諗到原來呢一餐係你短短貓生中既最後一餐。。。。
其實由你舊年6月底檢查發現有癲癇既問題之後我都有心理準備你會比其他貓早走,但係我從來無諗過會咁快,你先得5歲4個月大咋,明明仲係一個bb仔黎,我一直預你會8歲左右先走。。點知一切咁突然。
到依加我仲記得當晚9點20幾分,突然有一下好大聲既行雷聲,你就炸哂尾,自己自己慢慢行入廁所,之後就係廁所洗手盤下個好用力屙左條屎岀黎,之後就全身無力打側瞓左係地下。。。
當時我仲未明白嚴重性,之後抱你上床,你就已經眼神散渙完全對唔到焦,仲用嘴呼吸,一直叫你,你都無反應,我仲諗住只不過係嚇親,走去拎貓條俾你,睇下你食唔食,點知你好乖,明明係咁辛苦情況下都仲肯食,仲要食左半條。。
我見你肯食野即刻開心左啲,以為你無事啦,就放你係地下睇下識唔識行路,點知過一陣你就想嘔想嘔咁,之後就嘔左岀黎,你嘔完之後就成隻軟哂無力瞓左係度。呢一刻媽媽先知嚴重性,即刻拎你去睇急診。因為當時太突然,我即刻上網搵地址,但因為智利唔係有好多24小時既獸醫,所以當去到第一間獸醫時,醫生一睇寶仔既情況就話太嚴重,所以俾左個地址等寶仔去另一間醫院去醫。到左醫院時,寶仔就俾醫生拎走左,我地只能夠係外面一直等,而睇唔到寶仔咩情況。因為當時唔肯得寶仔一個要醫,所以一直等,等到凌晨12點幾一點時,醫生岀黎喇,就話寶仔醒返,依加吊水中,建議住院,但當時依然係見唔到寶仔咩情況,係咪真係佢口中既醒返。
我見醫生話醒返以為就係正常返,加上又唔忍心留寶仔自己一個留院驚佢怕,同埋上網想呢間醫院唔係咁好,所以就諗住唔住院,等聽日一早就同寶仔去返平時一直睇開嗰間獸醫睇下咩事。
點知我就係因為呢個決定,直接令到寶仔離開左我,寶仔返到屋企已經無左呼吸,牙肉都紫色,成身軟哂。
當時我一直呃自己係度一直睇寶仔身上有無呼吸起伏,仲試左做心外壓,點知發現寶仔鼻仔都好白,手手腳腳開始凍,我知道真係走左。
由細到大你都唔俾我抱超過1分鐘,點知我呢一生唯一可以一直抱住你既時候係呢一刻。我知道只有呢次機會可以好好抱住你,我一直抱一直抱,感覺到你身體愈黎愈軟,慢慢地身體排泄物都流岀黎我都唔捨得放手,一直抱住你。
一邊摸住你一邊去搵善終服務,真係好難受,一直諗明明幾個鐘前你仲活生生係度嫁,點解突然就不辭而別,點解有事既唔係我,我寧願用自己條命換你返黎。
事後我好後悔,係我害左你,到你走嗰刻,你係咩原因走我都唔知,我只能夠一直將你貓生最後一張身體檢查報告一次又一次問Ai 到底發生咩事。答案都係應激反應令到你休克,其實我責任最大,舊年你有癲癇時醫生有叫一直食葯食到你終老,但我諗住是葯三分毒,所以見你無發作既時候就無再一直俾你食,如果我有聽醫生話一直俾你食,可能你就唔會離開我喇。。。
媽媽好對唔住你,係我直接害到你,我真係好後悔,明明你離開左先四個月,點解覺得好似四年咁耐。每日係屋企諗起你,我依然好內疚,我知道喊係無用,但無辦法真係忍唔住,對唔住寶仔。
可唔可以投胎返黎搵我,俾個機會我好好再錫你一次。
自後你走左之後,我一直搵領養,睇下有無一隻貓同你一樣鼻仔有塊黑色毛,我真係好掛住你啊寶仔😭😭😭😭😭我愛你寶仔

✎ 你都叫牠什麼暱稱?
我叫佢寶仔,小寶寶😔🐱🫶🏻

🕯️ 進寶(寶仔)

Light a candle or leave a kind word for 進寶(寶仔) in the memorial hall. Free, no sign-up.

Visit 進寶(寶仔)'s place →