多士

多士，話咁快今日就係你嘅尾七喇
同你相伴咗十六年幾接近六千日，而家回想起同你相遇嘅細節，我都仲記得好清楚。 ​

2010年6月13日係你成為我家人嘅日子。 由你四個月細細粒、奀滋滋，到你青年時期跳跳紥紥、日日喺屋企末路狂奔；到你中年都仲好似 BB 咁活力滿滿；再到你年老時都仲係食得飲得瞓得屙得。

可惜去到最後，睇住你身體喺短短一年間斷崖式下降——由開始跑得慢、跳唔上梳化、後腳冇力、唔再醒獅、瞓覺時間越嚟越多、胃口細咗、左邊眼仔開始變白，甚至開始老人癡呆…就咁眼白白睇住你嘅生命慢慢消逝。 ​

多士，尾七係你功德圓滿嘅大日子，唔再係中陰身啦。 諗起前兩個星期，我企喺祭壇前同你講，如果你唔想等媽咪、想自己去投胎就去啦；結果第二日我就發夢，見到地下有個箱同埋啲蠟燭，夢入面我抱住你想放你入去，但你攬到我好實、點都唔肯入去，然後我就醒咗啦。 ​

乖女，既然你唔想走，就繼續留喺度陪我啦！ 等我百年歸老嘅時候，你記得要嚟接我呀。 媽媽冇親戚冇子孫，到時應該冇人燒衣拜祭我，所以我die咗之後應該會窮到燶；因此我每次燒嘢畀你，你一定要慳住使、唔好 fing晒佢呀，到時媽媽就靠你養返我轉頭啦！

​媽媽同自己講過，等BB過咗尾七，我就要好好重新展開新生活，但真係好難呢…